JOSUNE eta GORKA KONTU KONTARI ESKOLAN

Joan den ostegunean, maiatzak 30, Josune Zabala eta Gorka Tolosa gurasoak izan genituen eskolan kontuak kantatu eta kantak kontatuz.

Ze saio eder eskaini ziguten eskolako txikienoi! Txikitan amama Madalen esku handik beraiei kontatutako makina bat kontu ta kantaren berri eman ziguten, tartean Barbantxo eta Txomin ipurdi ipuinak ere kontatuz.

Eskerrik asko, bioi! Eta hurrengora arte!

ESKOLAKO JAIALDIA

Joan den asteazkenean gurasoei eskainitako emanaldia.

Primeran pasa genuen!

Ezkontza

2-3 urtekoak

4-5 urtekoak

1 eta 2 mailakoak

3 eta 4 mailakoak

4, 5 eta 6 mailakoak

Acrosport

ALBIZTURREN

     Maiatzaren 28an Albizturren izan ginen Nolegako abestiak eta antzerkien erakustaldia egiten. Bertan, Aizarna, Bidania-Goiatz, Albiztur eta Errezilgo ikasle eta irakasleak elkartu ginen.
    Goizean emanaldiak ikusi genituen, eta frontoian hamaiketako goxoa eman ziguten bertakoek; gero geuk eskaini genizkien geure bertso, abesti eta dantzak beste eskoletakoei, eta bazkaldu ondoren,  jolasetan ondo pasatzeko aukera izan genuen. 

Hemen argazki batzuk:

HHkoak ALBIZTURREN

Maiatzaren 28an egun ederra pasa genuen Albizturren.
Bidani-Goiatz, Aizarna eta Albizturko eskolakoekin elkartu eta elkarri emanaldiak eskaini genizkion: kantak, dantzak, antzerkia eta akro sport.

Hamaiketakoa egin ondoren parkean ibili ginen jolasean. 

Etxetik eramandako bazkari ederrak jan ondoren, jolasak prestatuta zeuzkaten eta beste eskoletakoekin batera giro ederrean ibili ginen.

IRUREN BARATZEAN IKASIZ

Maiatzaren 22an Irurera joan ginen baratzeko lanak egitera.

Baratzaren bueltan makina bat gauza ikusteko aukera izan genuen: oiloa txitekin, erleak erlauntzan eta lorez-lore, sagar pepittak sagarrondoan, zaldiek ebakitako garia, euren simaurra, zorriak eta amona mantangorriak baba-landareetan eta abar. 

Artoa eta pipak erein genituen. Patatak eta baba handiak bildu ondoren, jateko prestatu genituen eta jolasean ibili bitartean egin genuen hamaiketako goxoa.

Saio bikaina ikasturte honetako azkena!

UROLAkoen EMANALDIA ESKOLAN

Joan den asteazkenean, maiatzak 22, Azpeitiko Urolako DBH 1eko ikasle batzuk etorri zitzaizkigun eskolara, NOLEGA programaren barruan emanaldi bat eskaintzera.

Gure iazko ikaskide Naroa Ezama ere bertan zen, eta sekulako ikuskizuna eskaini ziguten: koplak, asmakizunak koplaka, "Ilargiarekin maitemindu zen" ipuinaren irakurketa, dantzak eta kantuak.... Ikasle guztiok soka-saltuan ibiliz bukatu genuen saioa.

Ederki ibili ginen benetan!

Mila esker eta datorren urtean ere zain-zain izango gaituzue!

 

 

GIPUZKOAKO ESKOLA TXIKIETAKO FESTA

Ekainaren 9an 

Gipuzkoako Eskola Txikien jaia

Aginan!!

BIDE HEZKUNTZA

   Gaur ertzainak etorri zaizkigu eskolara Bide Hezkuntza  erakustera.

    Lehenengo saioan 4, 5 eta 6. mailako ikasleak joan gara.  Bizikleta ibilgailua da eta han ibiltzen garenean gidariak gara eta ez oinezkoak. Horregatik, arau batzuk bete behar ditugu.

       Hasieran jostailuak eta ibilgailua bereizi ditugu. Patinak, trizikloa, scooterra eta patinetea jostailuak dira eta bizikleta, berriz, ibilgailua.  Bai jostailu eta bai bizikletan goazenean, beti kaskoa jantzita ibili behar gara.  Horietako bakoitzarekin non bai eta non ezin garen ibili erakutsi digu.

       Ondoren, trafiko-seinaleak erakutsi dizkigu: STOP, eman bidea, rotonda, abiadura muga, debeku seinaleak, ...

         Jarraian, bidegorrian nola ibili esan digu:  

• Lurrean marraztuta dauden jarraiko marrak ezin dira gurutzatu.
• Zatituta dauden marra gainetik pasa gaitezke.
• Eskuinetik ibili behar da.
• Aurreratu behar badugu, inor ez badator, ezkerreko karriletik pasa behar dugu.
• Bidegorrian zebrabidea badago, oinezkoak lehentasuna dauka.
• Errepidea zebrabidetik pasa behar badugu, bizikletatik jetxi eta oinez pasako gara.
• Bizikletantzako pasabide bereziak zein diren ikusi ditugu.

         Bizikletan goazenean, zer segurtasun gauza eraman behar ditugun esan digu: txirrina, arropa erreflektantea, balaztak, ...

               

              *  Katadioptrikoa:   gurpiletan eramaten diren plaka reflektanteak, laranja kolorekoak.

          Bizikletan goazenean, gure besoak dira "intermitenteak".

       Kotxean goazenean, beti, beti, beti, segurtasun-uhala jarri behar dugu. Bestela, airean aterako gara eta aurreko kristalaren aurka buruarekin joko dugu.  Uhala jarri gabe baldin badugu, "airbagak" ez du saltatuko.

IGARAKO ERROTAN

Maiatzaren 14an Igarako errota ikustera joan ginen 4-5 urtekoekin eta LHko 1. eta 2. mailakoekin.
Lineako autobusean jeitsi eta oinez joan ginen Loiolaraino eguraldi ederrarekin.

Azalpen ederrak eman zizkiguten Ekoetxeako Itziar eta Edurnek eta errotaren zati guztiak ikusi genituen.
Luis Marik jarri zuen martxan eta arto-irina egiten ikusteko aukera paregabea izan genuen.

Bisita ederra egin genuena Itziar, Edurne eta Luis Mariri esker!!!

ERREZILGO AUZO ETA MENDIAK EZAGUTZEN

    Maiatzak 15ean  5 eta 6. mailako ikasleak egun-pasako txango bat egin dugu gure herriko auzo eta mendiak ezagutzeko asmoarekin.

    Ibilbidea Etumetan hasi dugu. Horretarako, ezinbestekoa izan dugu gurasoen laguntza  gu denok bertaratu ahal izateko.

     Abieran, Etumetatik,  Txillarramendi  azpi bailara  ikusi dugu, Zinatz errekaren zuloarekin batera. Txilarramendi gainean Sañu mendia bereizi dugu.

     Handik, errepidez,  Erdoiztako bidegurutzeraino joan gara. Bertan, Erdoizta bailara aldera begira egon gara. Beste aldera begiratuta, Pagoeta mendia eta Santa Engrazi baseliza ikusi ditugu, baita urrutirago dagoen Zumaiako herria.

      Bidegurutzean abiatzen den pista hartu eta Txoondei mendiraino igo gara. Bertan ganadu asko zegoen. Mendibeltz eta Gatzume aldera begiratuta, igo behar genuen aldapa gogorra ikusi dugu. Mendi horiez gain Indo, Ezurtza eta Bearri re ikusi ditugu. Baita Urraki, hau eskuinean urruti dagoelarik.

       Txoondei menditik  Komisolatza mendatera jaitsi eta bertan taldearen argazkitxo bat atera dugu. Erdoiz-tako San Isidro baseliza borobila ikusi dugu.  San Isidro eguna izanik,  beranduxeago festak izango zirela pentsatu dugu.

       Pazientzia handiz  Mendibeltz aldera doan aldapa igotzen hasi gara eta Indo mendi parera iritsi garenean, bidetik atera eta zuhaitz azpian hamaiketako ederra hartu dugu. Gero Indo mendiaren tontorrera joan eta hainbat aldeetara begira egon gara. Alde batera, Erdoizta eta Beama azpi bailarak ikusi ditugu, Iturriotzeraino luzatzen dena. Beste aldera begiratuta, Askuen errekaren zuloa, Añua mendia, Sañu, ... eta urrutirago begiratuta, Loiola, Azkoitia, Anboto, Gorbea, ...

       Berriro indarrez bete eta Mendibeltz aldera doan aldapari ekin diogu. Lasai - lasai iritsi gara gora eta han Ezurtza inguruko basoa eta belazeak ikusi ditugu. Puntu honetan, ezkerretara hartu eta Mendibeltzeraino igo gara. Tontor honetatik  Erdoizta eta Beamaz gain, Granada errekaren  ( Altzolaras ) ibilbide gehiena ikusten zen.  Errezil herriaren aldera begiratuta, Letea, Ezama eta Ibarbi auzoen zatiak ikusi ditugu. Baita Errezilgo bailara inguratzen duten hainbat mendi ere: Ekaingaina, Akutu, Labarrita, Tonpordo, Armoia, Urraki, Menditxiki eta Mutxategi.

           Mendibeltzetik   Gatzumeraino joan gara. Han beste argazkitxo bat atera dugu. Hemengo ikuspegiak ere izugarriak dira!  Elurtuta zeuden Pirinioak ere ikusi ditugu.

    Gatzumetik jaitsi eta Azpeititik Zelatunera doan bide aldera joan gara. Bidean minazulo bat ikusteko aukera izan dugu. Ekainean minak eta labeak ikusteko asmotan gara.

         Ordubiak eta laurdenak aldera Zelatunera iritsi gara. Erniora igotzeko berandu zen eta bertan lasai - lasai bazkaldu eta jolastea pentsatu dugu.  Sutegiko  Maria Jesusek txabola kanpoko mahaian bazkaltzeko esan digu, haizetik babesean. Gainera, gero pasta batzuk ere oparitu dizkigu. A zer paotxa!

         Hirurak aldera  eskolarantz abiatu gara, Odritik Zelatun erreka ondotik jaisten den bidetik. Otegitxo parera iritsi garenean, argazki bat ateradugu, Errezil herria atzean genuelarik.

         Egun ederra, alajaina!

JANTOKIKO KARROAREN GURPILAK GARBITZEN

       Jantokiko karroaren  gurpilak denborarekin hariz bete eta mugitzeko behar luketen arintasuna galdu dutenez, hainbat ikasleen laguntzaz  askatu, garbitu eta atzera bere tokian jarri ditugu.

      Orain, atzera,  karroa arin-arin darabilkigu.

  Etorkizunerako mekanikariak  entrenatzen ...

DOMUSA TEKNIKERA bisita

       Pasa den maiatzaren 3an eskolako Lehen Hezkuntzako 3, 4, 5 eta 6. mailako ikasleekin DOMUSA TEKNIK lantegia bisitatzera joan ginen.

         Lineako autobusean bertaratu ginen eta han, Luis Uzinen gidaritzapean lantegi guztia ikusteko aukera izan genuen. Bisita hasi aurretik, Luisek enpresaren historia labur bat azaldu zigun eta baita erakus-gelan zituzten galdara desberdinak eta bakoitzaren funtzionamendu sistema.  Ondoren, tailerrera jaitsi eta  kaldarak egiteko prozesu osoa ikusteko aukera izan genuen:  txapazko piezak nola egiten diren, konponente ezberdinak, muntaia,  eta froga gela. Horrezaz gain bulegoetara ere joan ginen. Tartean, gurasoak bonboi goxo batzuk ere eskaini zizkiguten. Ederrak zeuden!

           Azkenik, opari polit banarekin eskolara bueltatu ginen. Buelta oinez egin genuen.

         

           Bisita aprobetxatuz, energiaren inguruan eskoaln egin da genuen aldizkariaren ale bat eraman genien, bertan DOMUSAri buruzko artikulutxo bat idatzia baikenuen.

            DOMUSAK maiatzean argitaratu duen aldizkaritxoan gure bisitaren berri ere eman du.  Hona hemen zati horren irudia.

.

SAIAZ, 25 URTE HERRITARREKIN

SAIAZ Gizarte Zerbitzuen Mankomunitateak 25 urte betetzen ditu aurten, eta  bideo bat prestatut dute, beraien historia eta proiektuen berri emanez.

 Horrela, bada, atzo 12ak aldera Borondegira joan eta herriko aitona-amona batzuekin batera bideo interesagarri hori ikusi genuen; ezagun asko agertzen ziren bideoan, baita gutako batzuk ere!

 SAIAZ, 1992an sortu zen, eta Albiztur, Bidania-Goiatz, Beizama eta Errezilgo 1.600 biztanleen ongizate eta bizi-kalitatea hobetzen laguntzen du.

Eskerrik asko, Elena eta Gizarte Zerbitzuetako langile guztioi, egiten ari zareten lan handiagatik!!!

 Hona hemen Borondegiko emanaldiko argazki pare bat:

 

Hori dela ea5 urte, hori ospatzen du aurten, 2019an, Saiaz Gizarte Zerbitzuen Mankomunitateak.

EBALUAZIO DIAGNOSTIKOA

Atzo eta herenegun  egin zuten LH4ko ikasleek Ebaluazio Diagnostikoa.

Fin-fi aritu dira bi egun hauetan, hainbat konpetentziatako jarduerak eginez ordenagailu txikietan. 

IRUREN BARATZEAN IKASIZ APIRILEAN

Apirilaren 11n Iruren ederki ikusi genuen udaberriaren eragina landareengan: guk ereindako haziak ernetuta, patatak eta garia jaiota, adaxkak hostoz betetzen, loreak alde guztietan...

Beste hazi batzuk erein genituen eta letxugak bildu genituen.

Tulipan lore, rukula eta mihiluarekin egindako lore sorta banarekin etorri ginen eskolara pozik.

Eskerrik asko Joxerra eta Aliceri.